Enkomputiligis Don HARLOW
"Kiu amas min -- tiu min sekvu!" -- Ŝi kriis, kaj leviĝis la glavoj. (malnova legendo) |
Domo en vilaĝo -- La eterna kaĝo, Kiun via aĝo Faris iluzi'. Ĉio estas for, do, Knaras olda pordo -- De l' iama kordo Sama melodi'. Ho, avinjo Jeanne, Tiu Orleano, Rememoro vana Venis nun al vi: Kiu amas min -- kapojn levu! Kiu amas min -- glavojn prenu! Kiu amas min! Kiu amas min... Varmo -- ne por dormo, Fajroj en la forno Vokas el la morno Al iama glor'. En okuloj palaj -- Fajroj kaj ĉevaloj, Venkoj en bataloj Trans turmenta for'. Tra la buŝ' sendenta Nur spireto venta -- Tiu ardo senta Vokas kun dolor': Kiu amas min -- kapojn levu! Kiu amas min -- glavojn prenu! Kiu amas min! Kiu amas min... Plonĝu en delirojn, Ŝtopu onidirojn -- Ŝatas nur martirojn Stulte la popol'. Do ne vi iama, Sed aliu damo Brulis en la flamo Laŭ supera vol'. Rememoru vintre: Kiu amis vin tre Tiam flugis cindre Super fajra bol'. Kiu amas min -- kapojn levu! Kiu amas min -- glavojn prenu! Kiu amas min! Kiu amas min... Lacas jam la manoj, Tedas jam infanoj -- Viaj nepoj sanaj Ĉe l' kaduka sin'. Ĉu pli bonus por vi Sortoglason sorbi, Cindre alten sori En la glora fin'? ...Ruĝas la katuno De l' subira suno, Kaj denove l' juno Arde vokas vi: Kiu amas min -- kapojn levu! Kiu amas min -- glavojn prenu! Kiu amas min! Kiu amas min... |
Tiĥvin 10.12.93 - 24.09.94 |