Enkomputiligis Don HARLOW
|
|
Enkomputiligis Don HARLOW |
|
Estas infanfesto en la urboparko. La malgrandaj vizitantoj de la marioneta teatro el Borna sidas sur granda herbejo sub iom grizaj kaj pezaj nuboj, kiujn ili tute ne rimarkas en tiu momento. Pro scivolo kaj mirego ili apenaŭ povas fermi la buŝojn! La pupoludisto sur la scenejo havas pulĉinelon en la mano kaj parolas al la gastoj. Sed la pulĉinelo ege maltrankvilas, ĉar la naskiĝtaga kuko malaperis. Imagu foje pri tio: La naskiĝtaga kuko estas for! Granda katastrofo, ĉu ne vere?! La pulĉinelo tute ne scias, kion fari? Tial li demandas la infanojn, kiuj estas ja ekspertoj pri malaperintaj kukoj. Kompreneble la infanoj pretas helpi la tre nervozan pulĉinelon, kiu skuas ĉiam denove la kapon. Sed ĝuste en tiu momento, kiam la unuaj pluvogutoj falas sur la plankojn de la scenejo, subite reaperas la serĉita kuko en la mano de la pulĉinelo. Kia hazardo, nekredeble! La pulĉinelo tre ĝojas pri tio, ĉar la naskiĝtaga festo nun povas esti daŭrigata! La pupoludisto adiaŭas amike de la infanoj kaj ankoraŭ diras, ke li nun devas rapidi, ĉar la pulĉinelo tute ne ŝatas pluvon. Kaj tiu vere tuj malaperas en la bruna valizo de la pupoludisto. Ankaŭ la infanoj fuĝas nun pro la grandaj pluvogutoj, kiuj falas pli kaj pli rapide, sub la vastajn arbokronojn de la maljunaj kverkoj. |
