Enkomputiligis Don HARLOW |
For neologismoj! ― jen devizo brava; ĉiu hom' konsentas, ke ĝi estas prava. Novajn vortojn oni nepre ne komprenas ― la signifon eĉ per gloso ne divenas. Enkonduki vortojn ― kia aroganto! Plej indigne plendas ĉiu lernadanto. For neologismoj ― hejmbakita aro! Al la evoluo ili estas baro. Ho, tre grava estas la problemo ― sciu ĉiun esp-an vorton hejme bakis iu; tial devas esti fonto de konsento nur la du mil vortoj de la fundamento. Sed tre granda parto de ĉi tiu list' estas ruz' sukcesa de l' neologist'; tial ni akceptu kun skrupula kribro nur la naŭcent vortojn de l' Unua Libro. Sed eĉ ilin kreis pape per dekret' Zamenhof en jar' mil ― okcent-okdek-sep: do la malamiko de neologism' ĵetu ankaŭ ilin al inferabism'! Kaj por konsekvenco damni sin je muto, ĉar la lingvo estas hejmbakita tuto. |