Enkomputiligis Don HARLOW

Ne plendas mi

de Heinrich HEINE

elgermanigis Friedrich PILLATH

Aperis en Elektitaj Poemoj, Berlin: Esperanto-Verlag Friedrich Ellersiek (2a eldono), 1920, p. 16

Ne plendas mi, ― rompiĝu, kor', pro vi,
Knabin' perdita nun, ― ne plendas mi.
Jen vi en bril' de diamant-trezor',
Sed regas nokt' en la dezerta kor' ...

Mi scias ĝin .... En ŝonĝo emocia
Mallumon vidis mi en koro via,
Viperon vidis ĉe la koro mi,
Kaj, amatin', kiom suferas vi.