Enkomputiligis Hector Alos i Font kaj
Don HARLOW
Aliaj poemoj de Kalocsay
La celoj ĉie dronis. Jam emerĝas Ĥimeroj por apokalipsa rajdo. La time trema koro vane serĉas Eskapon de l' minaca sanga tajdo. Mi vidas jam ĉen-rompi ĉie dise La mondo-skuan Stulton ĉiopovan, Kaj dume, delikate, zorge ĉize Fabrikas tiun ĉi soneton novan. - Kiam anoncis ploro kaj vekrio Kaj en la noktoj horizonta ruĝo: "La gotaj hordoj en la Imperio!" En Romo iu staris, sen rifuĝo, Pensante reve pri l' Aŭgusta paco Kaj flustris kelkajn versojn el Horaco. |