Enkomputiligis Don HARLOW |
Rakontu, kara Avĉjo -- dum sidas mi atente -- la grandan aventuron, en kiu vi sukcesis el kanibala poto eskapi lastmomente -- kaj draŝi tutan tribon! Rakontu! Vi promesis! Rakontu, kara Avĉjo, pri kiam vi vin trovis en krokodila buŝo profunde de rivero kaj kiel vi strangolis la beston kaj ne povis -- ĝis kuŝis ĝi senviva! -- leviĝi por aero! Rakontu, kara Avĉjo, rakontu tute plene, ankoraŭ unu fojon, pri via longa falo en fundomankan puton, kaj kiel vi grandpene elgrimpis post monato en nov-zelanda valo! Rakontu, kara Avĉjo, pri via mirosperto! Piratoj vin enĵetis -- ligitan manpiede! -- en kavon da mil kobroj kaj vi per granda lerto vin savis de la morto verŝajne senrimede! Rakontu, kara Avĉjo! Brigandoj vin alligis al trako de fervojo, sed antaŭ ol ekspreso transpasis tiun lokon, vi jam vin liberigis kaj kaptis la kanajlojn! Mi venas pro promeso! Rakontu, kara Avĉjo, la flugon stratosferen! Vi iris per balono kaj riskis tujan morton. Vi saltis kun intenco sen paraŝuto teren sur himalajan pinton -- kaj rompis nur rekordon! Neniu havas Avĉjon kun tiom da kuraĝo kaj tiom da rakontoj! Neniam ajn vi plendas! Vi estas sen-egala por lerto kaj por saĝo! Rakontu, kara Avĉjo! Rakontu, mi atendas! |