Enkomputiligis Don HARLOW
Kristnask-arbo alta staras kun steleto sur la pint'. Bonodoron oni flaras de frandaĵ' kaj hiacint'. Bondeziras kart', donaco, or-ruband', kandela flam', ke sur tero estu paco, ke sur tero regu am'! Venas Sankta Nikolao, dika, ruĝvestita gast'. De kabano al vilao rapidegas li kun hast'. El la sledo de boaco li salutas per proklam' Sur la tero estu paco, sur la tero regu am'! Amuziĝas ĉe la arbo ĉiu samfamilian'. Beb', infan', oldul' kun barbo ronde dancas man' en man'. kun rideto sur vizaĝo, laŭ kantad' en gaja gam'. Sur la tero estas paco, sur la tero regas am'. Ĝis post horoj noktomezaj daŭras fest' laŭ tradici', la palpebroj iĝas pezaj al etuloj pli kaj pli. Ekdormonte jam pro laco flustras ili en piĵam' Sur la tero restu paco, sur la ter' plu regu am'! |