Enkomputiligis Don HARLOW

Min lasu for!

de N. KURZENS

El la libro Mia spektro

Min lasu for de l' urba bru' detrua,
nerveme eĉ tramdratoj kie tremas,
sub feraj radoj la pavimo ĝemas
kaj akre krias aŭto haste brua.

Min lasu for! Min sonĝo ne karesas
en nokt' sendorma, nokto grize-ruĝa;
momenton eĉ ne ĉesas bruo muĝa,
torturas min, ripozi ne permesas ...

Sensenca pasis tago, disŝirita,
malpure ruĝa venas la vespero.
Min ĉirkaŭfermas blinda malespero.
Trafulmas cerbon penso nekonita:
— Mi freneziĝos! ... Dio, min kompatu,
min ... lasu ... for!!!

1931