Enkomputiligis Don HARLOW

Ne ĝenu vin

de N. KURZENS

El la libro Mia spektro

Ne ĝenu vin, sed prenu mem la vivon –
jam eble morgaŭ estos ĉio for.

Pri l' vivo vera revas ĉies kor',
al ĝi sopiras ĉiu floro eta;
per ĉiu kordo, en akordo ĉiu
nin vokas ĝi. Ĉu aŭdas vi? Rapidu,
ĉar velkos floroj, rusta iĝos kord'.
Al bordo mortsilenta portas velo,
jam eble morgaŭ – kiu scias? – fin' ...
Ne ĝenu vin! Ni mem la vivon prenu!

1933