Skarbra Foir'

elangligis William AULD

Ĉu vi iros al Skarbra Foir'?
Petrosel', salvi', rosmaren';
Menciu min al tiea junvir',
Ĉar li estis mia korsuveren'.

Teron li portu al mi po hektar'
Petrosel', salvi', rosmaren';
Eĉ inter sablo kaj ŝtormo de l' mar',
Kaj li estos mia korsuveren'.

Plugu vi ĝin per korn' de virŝaf'
Petrosel', salvi', rosmaren';
Per piprograjn' semu li kun celtraf',
Kaj li estos mia korsuveren'.

Falĉu ĝin li per serpo el led'
Petrosel', salvi', rosmaren';
Per pavoplum' ligu ĝin en posed',
Kaj li estos mia korsuveren'.

Mi respondis demandojn jam tri
Petrosel', salvi', rosmaren';
Nun eble vi faros same por mi,
Kaj vi estos mia korsuveren'.