Enkomputiligis Don HARLOW

Infaneto en lulil'

de Julio BAGHY

#17 en la poemaro La vagabondo kantas (1937)


Infaneto en lulil',
nun silento; ĉirpas gril':
cirrr ... cirrr ... cirrr ...

Miras luno kaj stelar'
la kantiston de l' kampar';
cirrr ... cirrr ... cirrr ...

Anĝeletoj mil kaj mil
salte dancas je la tril';
cirrr ... cirrr ... cirrr ...

Vin, hometo, gaja gril
lulas, lulas per la tril':
cirrr ... cirrr ... cirrr ...

Gardanĝelon sendos Di',
vin gardadi helpos mi ...
cirrr ... cirrr ... cirrr ...