Enkomputiligis Don HARLOW |
Maljunul' Kristnaska, kun la blanka barbo, vokas vin ni kore al kristnaska arbo. Lasu la vojiron, la eksteran mondon; por ripozi venu en la gajan rondon! Kandeletoj brilas. Bonaj homoj festas. En ilia koro la Bonvolo nestas. Por honori Pacon jen ariĝis nun ni; Maljunul' Kristnaska, venu ĝoji kun ni! Ankaŭ vi, servisto, kara Petro Nigra, certe vi laciĝis dum la vojo migra. Paŝu en la ĉambron! Estu nia gasto! La kristnaska tablo estas ne por – fasto. |
Bonaj homoj, karaj, mi salutas vin tre! Ŝatas mi la varmon, precipe nun vintre. Lumo de kandeloj, sento de la koroj min logis ĉi tien el fabelaj foroj. Pro l' "Bonveno"-diro vin mi dece dankas. Por la rekompenco la bonvol' ne mankas. Venas mi ne sola al la fest' solena: jen la Petro Nigra kaj la sako plena! ĉar mi estas justa, juste mi dividas ... Ĉiu havos tion, kion li meritas; al la diligenta donas mi donacon, al malvigla membro – vergon kaj minacon. |
Ĉiu estis bona. Vergon do vi kaŝu, por donacon doni sub la arbon paŝu! Al prestiĝo via tion nun vi ŝuldaa ... |
Bone, Petro Nigra, pro vi mi indulgas. |
Mia sak' malplenas ... Mi finis la taskon. Ĝis revido, karaj – proksiman Kristnaskon! Mi deziras al la verdstela frataro: estu tre feliĉaj en la Nova Jaro! |
Estu bona la Novjaro: plimultiĝu la membraro, havu sanon, forton, monon mondkongreson, lingvokonon! Vin evitu jenaj plagoj: geedziĝoj, mortotagoj, prezidanto lingve muta, kursgvidanto nur balbuta, grupa kaso deficita, ambicio venĝospita, libroŝranko ĉiam plena, redaktoro reformema, plialtigo de l' kotizo, la problem' prl l' organizo, mondmigrantoj dum kunsidoj, politikaj cirkumcidoj. Regu inter vi la Dio sen diskut' pri l' religio. |