Enkomputiligis Don HARLOW

La lasta aspiro de la partizano

de Canko MURGIN

aperis en El Popola Ĉinio, 61/4, p. 203


Klaketu ĉi tie por Latin-3 literaro Klaketu ĉi tie por versio unikoda

Postmorte mi revenos
por ĝui sub la sun',
simile al la greno
semita en aŭtun'.

Samkiel ĝi fieras
dum kresko en printemp',
mi ankaŭ reaperos
en la estonta temp'.

Mi kreskos en la arboj
plantitaj kun plezur',
mi vivos en la farboj
de bildoj el natur'.

Mi kreskos kaj aŭskultos
la kanton de l' arbar'
pri la bataloj multaj
de l' monda proletar'.

Fortondros la ribelo,
disfloros la liber' --
triumfos nia celo:
Justeco kaj la Ver'!

Gefiloj -- tre feliĉaj....
Ja en aŭtun-maten'
de manoj fortoriĉaj
rompiĝis la katen'.

Kaj hom' libera fortas,
Li estas nur venkant' --
en kor' li sunon portas,
en lipoj sonas kant'.

Li bridos eĉ vulkanon,
ventegon jungos li --
per sia forta mano
fulmegojn kaptos li.

Li plugos dum la tago
sur Mars' aŭ Jupiter',
vespere kiel sago
li flugos al Vener'...

Li tie nur promenos
kaj en malfru-vesper'
denove li revenos
al la patrino -- Ter'.

Sen havi dian benon
la vivo estos vers' ...
Konstruos li edenon
tra tuta Univers'.

Ho, certe mia nepo
kaj ĉiu homa frat'
kunkantos al birdpepo
kaj rajdos sur la Fat'.