|
A Kabanoj estas etaj domoj kun A anstataŭ la tegment'. Malajaj A kaj mil fantomoj baraktas en musona vent'. B B estas eta arbalesto inter la manoj de Amor'. Atenton! Amo estas pesto. Ĝi celas rekte al la kor'. C Nokto. La luna C okulas al parko, kie sub arbust' knabino knabon ame lulas sur ardaj C de sia brust'. Ĉ Ĝibhava viro sub ĉapelo. Ĉ estas renversita kuv'. Ĉ estas gaja pulĉinelo. La viron trempas griza pluv'. D Malgranda knabo kun pafarko. Amoron stulte trafis blag'. Mi ĉasis en printempa parko. Mi havis D, sed mankis sag'. E Sub E de kluzo sur sidbreto ripozas feo kun fein'. E estas ora kombileto. Ekprenu E kaj kombu ŝin! F F estas telefona stango. Sur ĝiaj dratoj kantas vent'. En vejnoj bolas juna sango, kaj ĉiu tuŝo estas tent'. G G sonas kiel hinda gongo. Iam malgajo estas gaj'. Mi forvojaĝos al Hongkongo. Post januaro venos maj'. Ĝ Ho, ŝipoj kun kampeĉa ligno, kie vi haltos por ripar'? Ĝ estas senkompara signo; Sumatro. Javo. Ĝibraltar'. H H tre similas al ruina kastelo sur malalta mont'. Estas vespero kaj la kvina. Ne revu vane pri renkont'! Ĥ Etaĝa domo kun tegmento. Sub Ĥ vi bone kaŝos vin. Eŭropo estas kontinento. Ĥ sonas bele. Ŝatu ĝin! I I estas svelta kamentubo. Ĝi altas el la noktomez'. Mi dirus al vi "amkerubo" kaj amus vin por ĉiu prez'. J Vintre sur ski' de J ni sportos. Juna Svedin', mi amas vin. Ĉiu vivanto iam mortos. Kandelo, apsergilo, fin'. Ĵ Ĵ estas Ĵ. Ĉu vi ne scias? En parko bonodoras roz'. Via talio tre gracias. Li mortis pro tuberkuloz'. K K estas granda reflektoro. Nokto. K traesploras ĝin. Mil steloj brilas kiel oro. Sub ili ŝvebas flugmaŝin'. L Orta angulo. L ĝin signas. Ekstere mandolinas vent'. Iam virino amrezignas. Ho paradizo! Ho serpent'! M Griza vulkano kun kratero. El Mi ne ŝvebas blanka fum'. Siringoj floras dum vespero. Kiso, promesoj, ambrakum'. N N estas stranga monogramo. Knabo scieme klinas sin super la paĝoj de romano. Naŭtilo, Nemo, Silver, Flynn. O O estas eta pluvoguto, O estas brila varma larm'. Ho, la unua amdebuto Kaj ĝiaj timo kaj alarm'! P Stango kaj eta ventflageto. Insulo kun pirata or'. Sub arbo blankas homskeleto kaj sonas eĥo de stertor'. R Ebria viro dum deliro. La strato estas balancil'. Kapa doloro. Stranga miro. Naŭzo. Vomemo. Maltrankvil'. S Atenton, aŭto, serpentumo! Post la angul' embuskas vin danĝero, falo, kvaronumo, atenco, vundoj, vivofin'. Ŝ Ho fabelaroj de junaĝo! Serpento kun arĝenta kron'! Fenikso en brulanta kaĝo! Princin' sur diamanta tron'! T Usono, briloj, stangoj, dratoj, trafiko, tramoj, aŭtoj mil; longaj, homplenaj, bruaj stratoj. Neonoj. Lumoj. Reklamil'. U Trankvilaj ondoj sur rivero kaj sur nivel' de blua lag'. Motorboato. Pasaĝero. Sonoroj. Krioj. Verda flag'. Ŭ Profunda valo. Supre luno pale ridetas al la ter'. Kasterlruino dum aŭtuno. Krada pordego kun heder'. V Kara malnova Virginio. Negroj. Oranĝoj. Dolĉa kant'. Floroj. Eksmoda idilio. Kaj vastaj domoj kun verand'. Z Zigzaga fulmo sur ĉielo. Tondrado kun subita pluv'. Hazarda ŝirmo en kapelo. Somero. Kisoj. Amopruv'. |
Sendu demandojn kaj proponojn al
Don Harlow <donh@donh.best.vwh.net>