Poeto! Viglu via laring'! Jen nia persist' (1) persista. Varingjen, ree bonfaras al la verda gento. En verda bindo supla, suplemento atestas al la varingjena povo; en poŝformato nestas ĝi kun PV. Ni ekzamenu ĝin. Per zorga kribro Go Duvoj al la poezia libro tre leĝerigis la vort-klarig-liston, kiu tre ofte ĝenas kritikiston. Kaj kia bunta mondo! El ravino ascendas - pum! dizela zepelino. Tuj malfermiĝas ĝia flank' per zipo, kaj elveturas en armea ĵipo du ĉimpanzinoj kun konstanta frizo kaj mansaketoj. En demoralizo, vane vetoas pigra konduktoro. Elsaltas odalisko, tiraljoro trejnita uzi en batal' mitralon, kaj ŝejko kiu rompis temporalon. Tuj sekvas pediatro, du kulakoj; jen eksponisto ŝakras pri kodakoj. Kelkaj piknikas nun per volovano, aŭ ludas per raketo kaj volano; Kvar turpaj vagabondoj ludas briĝon - spektante, oni sentas jam vertiĝon! Jen ŝakludanto matas post aroko; sur buldozita roko mekas boko; rigitan ĵonkon vent' komencas peli; al la ĉevalo licas jam ribeli per alternantaj baŭmoj kaj kalcitroj. Supre, defie, kriĉas akcipitroj. Jen pimpa tajpistin', kun pirueto, suspiras, "Iam esti film-subreto!" -- la rufajn buklojn tuŝas per la mano -- "...en kolorfilm-pozej'... unua plano..." Mi sentas por ŝi iom da amem', sed ne plu povas svati por mi mem, ĉar, en la plej ĝisnuna Esperanto, ree pramodas svat' per -- jes, peranto! |
Sendu demandojn kaj proponojn al
Don Harlow <donh@donh.best.vwh.net>