Ĉu ci memoras

de Sylla CHAVES

originale aperis en la nica literatura revuo, 1/5

Ĉu ci memoras? Estis sunsubiro...
printempo... plej lazura la ĉiel'...
mi vidis cin, ekbrulis pro deziro...
ci estis bela... kulpas cia bel'.

Ni ekpromenis. Kisis nin zefiro,
kaj la ĉielon kisis frua stel'..
mi kisis cin... rekisis kun deliro...
kis' estis dolĉa... kulpas kismiel'..

Noktiĝis. Sekvis ni laŭ riverbordo.
La birdoj preterflugis. En arbar'
cikadoj, ranoj blekis... am-agordo...

Kolombas koroj, tamen karno vulpas...
kaj ni... ĉu riproĉinda nia far'?
Ni estis junaj, kaj juneco kulpas.