Enkomputiligis Don HARLOW

Studaĵo

de William AULD

aperis en Nica Literatura Revuo, 4/1, p. 7


Ŝi staras nuda kaj enreviĝinta.
Tenere gaja sun' traĵaluzie
sur ŝia glata palo tremas strie
je varma kiso ŝultra kaj mampinta,

kiu ŝin lulas en la labirinta
lando de momentrevoj; nekonscie
ŝi ridetetas lante, ekpasie,
pro sia korpodoro hiacinta,

parfum' postbana, letargi' agrabla,
volupta nudo de intima solo,
momenta eĥo de ĝardeno' fabla...

(Unu gluteo klinas sin al flanko
sur la kolonon de femurmuskolo
streĉita sub la ŝarĝ' de ŝia blanko...)