Enkomputiligis Don HARLOW

Mia filino trijara

de William AULD

Unue aperis en la nica literatura revuo n-ro 4/6 p. 225


Betulo korte kisas nubojn,
aŭroras froste kristalbril',
kaj ŝiajn blondajn harojn vento
ŝaŭmigas. Mildo kaj trankvil'.

Kiel kariko apudlaga
ŝi klinas sin penseme: ran'
pulsante, pene, saltmeditas
sub la scivol' de ŝia man',

dum kveras ŝia kor' kuraĝe
sub diafano de l' skrupul'
kaj lante tra l' matenaj herboj
aldrivas flokoj de nebul'.