Enkomputiligis Don HARLOW
|
|
Enkomputiligis Don HARLOW |
|
Sur kampolim' sovaĝpapavo purpuris inter grena flavo simile al ruĝega tent'. La suno super ĝi fosforis; senbrue preter ĝi zumploris somera ŝercpetola vent'. Vi kun amato via iris; papavbukedon jen li ŝiris; vi ĝojis; kaj al kampolim' izola li vin mute gvidis; kaj tie vi kaj li eksidis; kaj poste vi sen ĉia tim' vin sternis sur kamplima bedo apude kun la ambukedo, kaj dronis sub multega kis' ... Kaj post longega muta kuŝo kaj post premega varma tuŝo vi vekis vin el la surpriz': Apude la bukedo velka; enkore rememoro kelka; la invirgeco ie for ... Nur ĉirkaŭ vi la ĉiam sama pejzaĝ', kaj bildo panorama: Milope la papava flor' ... |
