Enkomputiligis Don HARLOW

Kiam al juĝo

de William SHAKESPEARE

elangligis L. N. M. NEWELL

Unue aperis en la nica literatura revuo 6/4 (n-ro 34) p. 132


Kiam al Juĝo de medit' silenta
Mi vokas atestantojn el memor',
Pri mankoj multaj ĝemas mi, lamenta,
Kaj pri temp-perd' reveas kun dolor';

Tiam mi plore dronas pro amikoj
Kaŝitaj en senfina mort-mallum';
Relarmas mi pro foraj am-kronikoj,
Kaj belvidaĵoj fuĝaj kiel fum':

Mi tiam plendas plendojn rezignitajn,
Malĝojojn sumas mi kun peza ve',
Kaj kvazaŭ novajn ŝuldojn nepagitajn
Repagas tristan konton de l' pase'.

Sed se, amiko, mi pripensas vin,
De perdoj kaj malĝojoj venas fin'.