Enkomputiligis Don HARLOW

Splitoj

de Julio BAGHY

Unue aperis en la nica literatura revuo 6/5 (n-ro 35) p. 163


1
Kun strutstomako vanus pridiskuti,
ke stulte estas ― razlamenon gluti.
Simile strutohom', dum li galopas ―
per oro, gemo sin li stulte ŝtopas.
Instigas ilin sama sent' al ago:
ador' de di' komuna ― la stomako.
2
Mi pensas enviindaj ― dum mi vagas ―
blindulojn, surdmutulojn sur la stratoj;
nek vidas ili kiel beste agas,
nek aŭdas, kion blekas la homfratoj.
3
Estante deksepjara
knabino prude plendas,
ke ĉiu juna viro
diable ŝin ektentas;
estante sepdekjara
komencas ŝi ekplendi,
ke eĉ diablo ne plu
deziras ŝin atenti.

Estante deksepjara
junulo "donjuanas",
postkuras ĉiun jupon,
la amon eĉ profanas;
estante sepdekjara
li jam "platone" planas,
sed, ve, ĉi amindumo
"duonjuana" ― vanas.