Enkomputiligis Don HARLOW

Jen oni venis diri...

de Maurice MAETERLINCK

elfrancigis G. WARINGHIEN

Unue aperis en la nica literatura revuo 7/1 (n-ro 37) paĝoj 28-29


Jen oni venis diri
(mia infan', mi timas)
jen oni venis diri,
ke pretas li foriri.

Kun lampo lumigita
(mia infan', mi timas)
kun lampo lumigita
mi pli proksimen volis.

Ĉe la unua pordo
(mia infan', mi timas)
ĉe la unua pordo
la flam' subite tremis.

Kaj ĉe la dua pordo
(mia infan', mi timas)
kaj ĉe la dua pordo
la flamo ekparolis.

Sed ĉe la tria pordo
(mia infan', mi timas)
sed ĉe la tria pordo
la lumon morto premis.