Enkomputiligis Don HARLOW
|
|
Enkomputiligis Don HARLOW |
Solveig Öster, 12-jara feroadevena knabino, nun loĝanta en Kopenhago, rakontas:
La globkapa nigra baleno (= globicefalo) estas speco de delfeno, 7m. longa; ĝi ofte pezas 2500 kg-ojn.
La balenoj naĝas preter la Feroa Insularo, ofte en amasoj de 100-1000 bestoj. Ĉasado de tiu baleno forte ekscitas la loĝantojn.
Kiam oni en tiu regiono aŭdas la krion "Grindabod" = balenvizito, ĉiuj forĵetas, kion ili havas en la mano kaj kuras al la marbordo. Dum la viroj aranĝas la boatojn, la virinoj kolektas ŝtonojn. Tiu boato, kiu unue observis balenon, hisas jakon aŭ flagon sur la maston.
Baldaŭ ekflamas fajro sur ĉiu promontoro por proklami la ĉasadon de balenoj.
Nun ĉiuj boatoj estas en la akvo kaj la viroj remas plenforte por nepre peli la balenojn en la fjordon. Maljuna vir-baleno gvidas la amason. La viroj havas tranĉilegojn, 30-35 cm longajn, 9 cm larĝajn kaj hokon 30 cm longan kaj 2,5 cm dikan, kiun lastan oni fiksas tre forte al ŝnurego.
Ĉiuj krias, kriegas. La unua boato ĵetas ŝtonojn inter la balenojn, baldaŭ estas tuta ŝton-bombardado, kaj la balenoj, kiel oni planis, fuĝas en la fjordon. Boatoj formas nun rondon ĉe la eniro de la fjordo, kaj la balenoj ne povas eskapi al la maro.
Kiam la gvidanto de la balenoj alproksimiĝas al la boatoj, la kaptistoj klopodas piki ĝin per la tranĉilegoj. Se oni trafas ĝin, ĝi tute sovaĝiĝas kaj rapidegas al la marbordo kaj la tuta aro kun ĝi. Sed tie la akvo estas tro malprofunda, kaj la balenoj ne plu povas naĝi.
La viroj nun saltas en la akvon kaj buĉas la balenojn. Estas terura masakro. Fine ili sukcesas tratranĉi la kolojn de la balenoj. Per hokoj la virinoj kaj la maljunaj viroj sur la bordo tiras ilin teren. La virinoj kaj maljunuloj ne rajtas esti en la boatoj pro la danĝero.
Kiam la ĉasado estas finita, ĉiuj festas. Dum du tagnoktoj oni dancas, kantas kaj drinkas sen dormo.
Post la festo oni dividas la balenojn inter si. Ĉiu loĝanto de la insulo ricevas ion. Tiu viro, kiu unua observis la balenojn, sola ricevas la plej grandan balenon.