Enkomputiligis Don HARLOW |
La aŭtoro estas 27-jara instruisto en Sudafriko. E-isto de 1955, tre baldaŭ verkisto, nuntempe redaktoro de la landa gazeto. Ĉijare li gajnis per bela novelo la z-an premion en la Belarta Konkurso. Unuavice li estas poeto tre multpromesa.
Jen la lumo ekas oriente, nove elvokante en ekziston ĉiujn aĵojn de la ter' eterna, hieroglifojn de signifo. Ĉio -- konturoj de la rifoj kaj riveroj, birdkanto, ĉieloblua flor' monteta kaj tutaj alfabetoj de l' naturo -- portas spurojn de histori' pramonda, de forfrotiĝ', modifoj, sonŝanĝaro, kaj la palimpseston de la jaroj kies skribo spitas la komprenon. Sed en ĉi momento de ekklaro oni pri l' misteroj nur divenas (ignorante ĉiujn ĉi komplikojn) la ripeton direktantan al ... ĉapitro la unua, al Genezo. Mondo kunsolviĝas en la ombroj, en l' okuloj perspektivoj mortas, kaj, malgraŭ anticipoj pri morgaŭo, jen la tera libro nun fermiĝas, ĝis postrestas nur titolo nigra sur l' ekstero de ... Apokalipso. |