Enkomputiligis Don HARLOW

'Sidiĝis mi: por noti ĉion klare'

de Johann Wolfgang von GOETHE

elgermanigis Kálmán KALOCSAY

Aperis en Romaj Elegioj & La Taglibro, Literatura Mondo, Budapest, 1932, p. 49

Sidiĝis mi: por noti ĉion klare,
Leterojn kaj Taglibron nun mi prenis,
Kiel -- al mi kaj al Ŝi ĝojprepare --
Kutimis mi, se l' mond' en dormo svenis,
Sed, strange, vortoj fluis nur avare,
Ĉiun detalon citi nun ne venis.
Enpaŝis la knabin' kun vespermanĝo,
Salutis digne, lertis pri l' aranĝo.